Laing batch sa mga benipisyaryo sa probinsya sa Sarangani ang nakahilak sa kalipay human nakabaton libre og mga wheelchair, tungkod, crutches, walker ug uban pang matang sa saklay gikan sa Serbisyong Sarangan Community Outreach Program ni Governor Steve Chiongbian Solon katugbang ang Department of Health ug Sarangani Provincial Health Office, taliwala sa nagpadayon nga pandemya.
Nakadawat pud bag-uhay lang og dungag Four Hundred Thousand Pesos (₱400K) nga kantidad sa mga materyales ang lima (5) ka asosasyon sa mga PWD kon person with disability sa Sarangani Province na-organisa sa Glan, Alabel, Malungon, Maitum ug Malapatan, alang sa ilang nagpadayon nga livelihood program. Dungag kini sa naunang gihatag nga balor kapin Usa ka Milyon ka pesos (₱1M).
Segun nila Ms. Asma Akmad, ang program manager sa Serbisyong Sarangan Community Outreach ug Certified Wheelchair Assessor Jhukarnen Jamalol, gitudluan ug gi-pondohan ang panginabuhian sa mga PWD sa pagbuhat og dishwashing liquid, detergent powder ug fabric conditioner. Gani, ni-income na sila sa mao nga livelihood. Pinaagi kana sa dugay na nga partner ni Governor Solon sa pagpahigayon og mga charity work, ang LDS o Latter-Day Saint Charities, ang humanitarian arm sa simbahan sa Mormon.
Bise Gobernador pa kaniadto si Governor Solon, prayoridad na sa iyang pagpangalagad ang pag-ayuda sa mga PWD, may diperensya sa pandungog ug panglantaw, mga senior citizen hilabi na ang mga na-stroke, ug mga kabataan nga gipakatao nga may cerebral palsy kadtong dili makabarog tungod sa problema sa kaunuran ug kabukugan, sa pag-abag sa mga partner organization sama sa Physicians for Peace ug Southern Philippines Medical Center (SPMC), ug nila Vice Governor Elmer De Peralta, tanang board member, mga mayores ug nila Senador Manny ug Congressman Ruel Pacquiao.
Adunay pinasahi nga programa si Governor Solon sa pagpahigayon og physical therapy, paghilot sa kalawasan aron maulian ang mga na-stroke ug adunay cerebral palsy. Gitudluan ang mga ginikanan ug kabanay sa saktong pagmasahe aron sila na ang mu-alalay sa ilang mga mahal sa kinabuhi.
Sa bendisyon sa Kahitas-an, daghan ang ni-testimonya nga may umoy ug makalihok na ang ilang lawas tungod sa paglahutay sa physical therapy. Usa na niana si Nelson Lampawan, dise otso (18) anyos, gipanganak nga may cerebral palsy, taga-Barangay Kapate, Kiamba. Natagaan pud sya og wheelchair.
Ang inahan nga si Josephine Millama, taga-Barangay JP Laurel, Malungon ang emosyonal nga mapasalamaton usab tungod benipisyaryo sila sa maong livelihood program sa Kapitolyo. Iyang gidayig sila Governor Solon, Mayor Tessa Constantino ug ang Malungon Municipal Social Welfare and Development Office tungod luyo sa pandemya, nakatutok sa gihapon ang LGU sa kaayuhan kanila matud pa nga mga ginikanan nga adunay kondisyon ang mga kabataan. Aduna kini anak baynte singko (25) anyos nga may kondisyon nga autism.
Samtang, atol sa pagpahigayon og Serbisyo Caravan Para sa Sarangan kauban sila Mayor Nonoy Salarda, nakapatulo sa iyang mga luha si Jennifer Fernandez, trantay uno (31) ang edad taga-Domolok, Alabel human natuman ang dugay na niyang gipangandoy nga wheelchair. Sobra napulo (10) ka tuig nang nawad-an og kusog ang iyang lawas. Pwede na matud pa syang makaadto sa ilang simbahan para musimba gamit ang nadawat nga wheelchair gikan sa opisina ni Governor Solon.
(Provincial Information Office – Sarangani)