Gisaad ni Gobernador Bambi Emano nga laumang sa umalabot Hunyo ning tuig pagasugdan ang plano sa katukoran sa 3-storey structure isip bag-ong PHO building human kini gilamoy sa kalayo sa miaging semana.
Sa pagkakaron padayon usa ang serbisyo sa buhatan sa Provincial Health Office (PHO) luyo sa pagsulay nga nahiaguman dihang gilamoy sa kalayo ang buhatan.
Taliwala niini pabiling mapasalamaton si Gobernador Bambi ug PHO Head Dr. Jerie Calingasan nga walay nakalas nga kinabuhi nga maoy mas labing importante.
Sa tinguha nga dili maapektuhan ang panerbisyo sa mga empleyado taliwala sa kasakit nga gibati ning panahona tungod sa pagtupok sa kalayo sa ilang opisina ug mga kabtangan sa sulod wala nagpatarog ang mga empleyado langkoban ang nagkadaiyang division sa maong buhatan nga mosulod sa trabaho.
Temporaryong mamahimong opisina sa mga PHO employees ang Provincial Training Center ug ang tanang kinahanglanong ipahigayon nga meetings ug trainings mahitabo na sa Provincial Engineering’s Admin Office o sa Provincial Governor’s Office’ Conference Room.
Samtang sa buhatan sa Provincial Early Childhood Care and Development ang katunga sa MisOr Cares staffs mamahimong mag-trabaho sa ilang mga tahas, ug dunay laing katunga nila nga 24/7 nanerbisyo mahimutang sa PDRR container van.
Ang buhatan sa Provincial Agriculture Office sab ang mamahimong temporaryong vaccination center.
Nagtinabanga usab ang tanang departamento ug hiniusang miabag sa pagbangon sa PHO-MisOr kon diin sila midonar og nagkadaiyang kabtangan nga magamit sa PHO sama sa mga bond papers, PPEs, ug computer sets.
Ang tanang empleyado sa PHO dala-dala ang ilang pipila ka mga gamit nga dunay marka sa sunog sama sa mga dokumento, positibo pa gihapon nga sa hustong panahon bisan sa hinay-hinay makabangon ug makalahutay sa hingpit gikan niini nga trahedya.
Gani man atol sa pagkasunog wala mibiya si Gobernador Bambi uban si Dr. Jerie Calingasan, pwersa sa MODHA ug mayorya sa Sangguniang Panlalawigan nga mitutok hangtod wala gideklarar sa mga firefighters gikan sa Bureau of Fire Protection- 10 nga fire-out ug under control na.
Dili malikayan nga bation ang kasubo ug huyhoy ang abaga apan nagpabiling lig-on aron mapaabot sa tanan nga dili angay magpabilin sa kasub-anan ug makab-ot lamang ang pagbarog og balik kung katimbayayong ang tibuok Kapitolyo Probinsyal. (Provincial Information Office – MisOr)
