Usa ka 47-anyos nga babaye ang nadakpan sa Mactan-Cebu International Airport (MCIA) niadtong Biyernes, Marso 28, 2025, human makit-an ang upat ka buhing bala sulod sa iyang yellow backpack atol sa final security screening.
Ang suspetsado, nga ginganlan lang og “Duday”, usa ka Human Resource Manager ug residente sa Lapu-Lapu City.
Sumala sa report, nakita ang mga bala pinaagi sa X-ray scanning, hinungdan nga gihimo ang manual inspection sa mga personnel sa Transportation Security uban sa presensya sa Mactan-Cebu International Airport Police Station (MCIAPS).
Gipahibalo sa mga awtoridad nga wala makahatag og klarong tubag ang babaye kung giunsa ug ngano nga adunay bala sa iyang bagahe, hinungdan nga gidakop siya sa PNP Aviation Security Group (AVSEGROUP).
Ang nadakpan kasamtangang mag-atubang og mga kasong kalapasan sa Republic Act No. 10591, o ang Comprehensive Firearms and Ammunition Regulation Act, ug Comelec Gun Ban, nga istriktong nagdili sa pagdala og armas o bala ilabi na sa panahon sa eleksyon.
Ang mga awtoridad nagpahinumdom sa mga pasahero nga istrikto nga gidili ang pagdala og mga armas ug bala sa mga pampublikong dapit sama sa mga tugpahanan.
Padayon pa usab nga gisusi karon sa mga otoridad kung dili ba kini “tanim-bala” modus. (Renante Socia Lada)