Davao del Sur – Dakpan ang usa ka babaye sa mga ginsakpan sa Bansalan Municipal Police Station (BMPS), Criminal Investigation and Detection Group (CIDG) ug Provincial Intelligence Unit (PIU) sa Davao del Sur Police Provincial Office (DSPPO) nga namaligya ug LPG refilled butane canisters.
Si Police Major Peter Glenn Ipong, hepe sa BMPS miila sa dinakpan nga si Theresa Escalera Sarda, 24 anyos, nagpuyo sa Magsaysay St., Barangay Poblacion Dos, lungsod sa Bansalan.
Nakumpiska sa mga otoridad gikan sa dinakpan ang mukabat sa 51 ka LPG refilled butane canisters nga gibaligya niini sa kantidad nga 45 pesos matag usa, tulo ka budget gas butane canisters nga tag 50 pesos matag usa ug kinse ka mga basiyo nga butane canisters. Nakuha usab ang 50 pesos nga marked money nga maoy gigamit sa mga otoridad sa kunohay pagpalit ug butane canister ngadto sa suspek.
Ang dinakpan gipasakaan na ug kaso’ng kalapasan sa Presidential Decree 1865 kun ilegal nga pagbaligya ug mga produktong petrolyo. Hinuon, temporaryo kining nahimong gawasnon human nakabayad ug piyansa nga mukabat sa ₱ 30,510 ngadto sa korte.
(Source: Bansalan Municipal Police Station)