Cebu City – Duha ka kinabuhi ang nakalas sa laing aksidente sa sakyanan sa Transcentral highway, particular sa Brgy. Gaas, Balamban, alas 11:40 gahapon sa udto.
Nasayran nga gidaro sa usa ka SUV o sports utility vehicle ang usa ka motorsiklo hinungdan sa kamatayon sa duha.
Unang nakabsan og kinabuhi ang 30 anyos nga dalagang si Deal Estrada nga taga V. Rama Ave., Brgy. Guadalupe, Cebu City nga patay nang nahiabot sa tambalanan sa Balamban.
Mitaliwan usab pagka alas 4 sa hapon ang 33 anyos nga si Winston Alatraca nga mulupyo sa Brgy. Labangon, Cebu City.
Ang nagmaneho sa Ford Ranger nga si Kirk Mharwin Labiste, 22, nga taga Brgy. Lawaan, Talisay City gitanggong pa sa kapolisan sa Balamban.
Naangol usab ang pasahero ni Labiste nga si Reslie Cardama, 18, nga taga brgy. Tisa, Cebu City.
Suma pa sa imbestigador nga si S/Sgt. Donald Pitogo, nagpaingon sa Balamban ang motorsiklo sa mga biktima gikan sa siyudad dihang ilang nasugatan ang disgrasya sa gikasugat nga SUV ni Labiste.
Ang mga kabanay nila ni Estrada ug Alatraca miingon nga nagpadulong unta sa LTO Balamban ang duha. (Jhon Tadlip/JTY)
(News & photos courtesy of Balamban Police Office)