Cebu City – Usa ka duguung adlaw alang sa usa ka pamilya sa Dakbayan sa Talisay.
Nag-unong sa ilang kamatayon ang magti-ayon human sa pag sige’g away, labing uwahi niini ang isyu sa labhonon, sa sitio Nangka, Barangay San Roque, sa nahisgutang Syudad, Disyembre 11, 2020.
Unang gidunggab sa bana, ang iyang 42-anyos nga asawa, kinsa usa ka magtutudlo.
Naghikog sab ang bana gamit ang alambre pagkahuman sa hitabo.
Sa pasiunang imbestigasyon, nasuta sa kapolisan nga uwahing lalis sa duha mao ang labhonon.
Mi ikyas pa unta ang asawa gawas sa ilang panimalay, apan wa na kini maka gawas kay gi kandado ang agianan.
Aron makasud ang mga mi respondi, gi guba ang gate ug gidala sa tambalanan ang biktima, apan wala na kini maluwas pa.
Samtang, patay sab ang bana nga naghigot sa iyang liog gamit ang alambre, didto sa loyo sa ilang gipuy-an.
Matod sa mga silingan nga pirmi nilang madunggan nga mag-away ang magti-ayon apan wa lang sila manumbaling.
Gani, matod pa, niabot na sila sa Barangay kaniadto ug gihusay.
Nagtrabaho kaniadto ang bana, apan gipaundang sa misis aron malikay sa pag galgal sa mga kauban niya. (Jhon Tadlip Jr./JTY, photo courtesy of contributed photo)
(Source: Talisay City Police Office)