Ya comenda el Alcalde John Dalipe con el “Zamboanga City Triathlon Team” por el de ila victoria na concurso de “Ironman 5150 Dapitan”, un internacional actividad de deportes que ya ase na ciudad de Dapitan, Zamboanga del Norte del Septiembre 10.
Ya ase el comendacion si Dalipe cuando maga atleta Zamboangueño ya visita de cortesia con el alcalde na City Hall del Viernes.
Si Dalipe ya rindi gracias con el maga atleta por el de ila esfuerso de llevar orgullo y honor con el ciudad de Zamboanga.
El Zamboanga City Triathlon Team ya gana como el campeon na competicion del Ironman 5150 Dapitan del Septiembre 10.
El miembros del “Relay Team 1” que ya gana el campeonato amo canda Jetro Paul avilla, Roel Quitoy, y si Samuel Lindayan.
Mientras tanto, el miembros del “Relay Team 2” que ya gana terser puesto amo canda Grant Vincii Villanueva, Jovie Toribio y si Kik Russel Suello.
Si Dalipe ya diriji con Dr. Cecil Atilano, el director de deportes del ciuad, para mira el posibilidad conduci el semehante actividad de deportes na futuro aqui na ciudad de Zamboanga. (B. Garcia, photo courtesy of Zamboanga City Triathlon Team)