El Zamboanga City Police Office (ZCPO) ya implementa cambio na liderato del 2nd Zamboanga City Mobile Force Company (2ZCMFC) del Viernes.
Con Police Major Heterence Abraham ya designa como el oficial-en-cargao del 2ZCMFC y ele ya releva con Tiniente Coronel Reynald Ariño.
Con Abraham ya instola na puesto si Police Brigadier General Gerardo Umayao, el deputy regional director for administration (DRDA), quien el huesped de honor del ceremonya del cambio na liderato del 2ZCMFC.
Si Umayao ya comenda con Ariño por su mga buen acomplisimiento y ya desapia con Abraham para continua o ase pa mas bueno con el cosa ya puede compli el antes hefe del 2ZCMFC.
Si Ariño ya conseja con el mga personajes del 2ZCMFC para continua dale orgullo y honor con el mando por medio de trabrajar bien para el beneficio del comunidad y mga vivientes.
Na parte de Abraham, ya promete le que continua ase el mandato de 2ZCMFC con mas alto excelencia. (B. Garcia, photo courtesy of 2ZCMFC)