Iriga City – Bilang parte kan padagos na pag-andam sa nagraraning bagyo sa kabikolan, ibinariwas na kan local na gobierno kan Baao, Camarines Sur an apat na units kan motorized banca sa apat na barangay, na magagamit oras na nagkaigua nin evacuation sa panahon nin pagbaha sa sinambit ng banwaan.
An apat na barangay na nakinabang kan sinambit ng motorized banca iyo an San Francisco, San Jose, San Roque asin Sta Eulalia anas madaling bahaon na barangay sa sinambit ng banwaan.
Sa nagin pahayag ni alcalde Jeff Besinio, habu na niyang mautro an nangyari kan nagtalikod na kalamidad kun sain nasasakitan an mga namamanwaan sa pagpasiring sa mga salbadong lugar huli sa kawaran nin malulunadan.
Inurgulyo pa kan alcalde an bagong speed boat kan banwaan na sa oras nin emergency magagamit kan mga namamanwaan.
Ginibo an turn over kan nasabing mga banca sa ginibong meeting kan MDRRMC bilang parte kan pag-andam sa nagraraning bagyong si Quinta.
An banwaan nin Baao saro sana sa magkapirang mga banwaan sa probinsya na madaling abuton nin baha sa panahon nin bagyo O kaya mga pag-oran. (OIC Melvin Barayoga, RPN DZKI Iriga)
(Source: LGU Baao)
