El mga autoridad ya confirma del Jueves cay muerto ya el Americano, con quien ya abducta na provincia del Zamboanga del Norte, asegun con el policia.
Si Police Lieutenant Colonel Ramoncelio Sawan, el interino portavoz del mando regional del policia, ya habla cay si Eastman Elliot ya muri durante el noche que ya abducta conele el cuatro armao personas na su mismo casa.
Si Sawan ya hace el confirmacion un mes y 18 dias despues que ya abducta con Elliot na su casa del noche del Octubre 17, 2024 na Barangay Poblacion, Sibuco, Zamboanga del Norte.
“En curso del investigacion, el CIMTG (Critical Incident Management Task Group “Eastman”) ya obtene informacion desde con un testigo sobre el muerte de Eastman durante el noche del su abduccion,” si Sawan ya habla na un declaracion.
Asegun con el testigo, si Eastman ya sufri dos irida de tiro cuando ya precura le resisti con el mga cautor y ya muri na banca de motor mientras ta transporta conele desde Sibuco.
El mga cautor ya decidi buta con el cuerpo de Eastman na mar cuando ya sabe sila cay ya muri el victima.
A pesar de diligentes operaciones de buscada, el CIMTG “Eastman” nohay pa encontra con el resto del Americano.
Si Eastman, quien un nativo de Vermont, Estados Unidos, ya casa con un nativo de Sibuco, Zamboanga del Norte.
Durante el incidente, ta esta ya le na Sibuco dentro de sinco meses. (B. Garcia)Â