El mga personajes del Fuerza Naval ya salva con un pescador ta man anud na mar por dos dias na provincia del Tawi-Tawi, asegun con el militar del Jueves.
Si Rear Admiral Francisco Tagamolila Jr., el comandante del Naval Forces Western Mindanao (NFWM), ya identifica con el salvao pescador como si Roco Sambas, 40 años el edad, un residente del Barangay Tandu Banak, Sibutu, Tawi-Tawi.
Asegun con Tagamolila, con Sambas ya salva del miercoles na vicinidad de 6.4 millas nauticas norte del Isla de Andulingan, Sitangkai, Tawi-Tawi.
Si Tagamolila ya habla, el mga personal naval abordo na BRP-Jose Loor Sr. (PC390) ta conduci patrulia de seguridad maritima cuando ya columbra sila con Sambas ta man lutao na mar.
“El mga tripulantes del barco ya man manibora de rescate, geriando salvavida con el pescador y segurao ya lleva conele ariba el barco,” si Tagamolila ya habla.
Si Sambas ya informa con el mga tripulantes del PC390 cay ta man anud-anud le ma mar desde Lunes despues que ya sumi de suyu barco de pesca serca na isla de Sibutu.
Si Tagamolila ya habla, el mga personajes del PC390 ya dale camisa, caliente comida, cape y ya cura el irida de Sambas, quien na condicion estable ya y bajo el ciudada del mga personal naval na barco.
Asegun con Tagamolila, el salvada del pescador ta demostra el dedicacion del Fuerza Naval salva vida y responde na mga emergencias, demostrando de ila preparacion suporta na respondida de desastre y asegura el seguridad publico na region. (B. Garcia)