Un miliciano el ya muri na un incidente de tiroteo na costa este del ciudad de Zamboanga, asegun con el policia del Jueves.
El Zamboanga City Police Office (ZCPO), ya identifica con el fatalidad como si Jose Jay Dagalea, 47, designao na campo militar destante na Barangay Panubigan.
Asegun con el policia, el incidente ya ocuri mga alas 3:55 del Miercoles tarde na camino de desvio, Barangay Panubigan, costa este del ciudad de Zamboanga.
El esposa de Dagalea, si Rubylin Sarigumba, 38 años el edad, ya informa con el policia cay muntao sila na un motociclo estaba na Barangay Bolong cuando ya hace canila para el dos desconocidos personas na camino.
Sin provocacion, uno del dos desconocido personas ya tira con Dagalea na pecho y ya escapa para na direccion del Barangay Bolong despues del incidente.
El mga personajes del Zamboanga City Police Station 2 ya recubri un capsula de calibre .45 pistola na lugar del crimen.
El policia ta continua de ila investigacion para determina el motivo y identifica con el mga suspechao del incidente. (B. Garcia)