Davao City– Way kamatooran ang akusasyon sa grupong Gabriela Women’s Party nga giingong niluog nga pagpatay sa Deputy Secretary sa Guerilla Front 2 Southern Mindanao Regional Committee sa New Peoples Army nga si Cindy Tirado Libot nga nahitabo didto sa Purok 3-A Barangay Canocotan syudad sa Tagum niadtong nakalabayng Abril kinse ning tuiga.
Kini ang hugtanong gibutyag ni Police Regional Office XI Director Marcelo Morales nga matud pa di tinuod ug malisyuso gumikan kay kanunay nilang giuna ang pagtamod ug pagprotekta sa tawhanong katungod sa matag usa, ilabi na gyud sa katungod sa kababayen-an.
Sumala pa ni Morales nga usa ka lehitimong hiniusang operasyon uban sa 71st IB, Philippine Army ang nahitabo human nga isilbi ang warrant of arrest batok kang Jay Mendoza, executive commander sa Guerilla Front, Sub-Regional Committee 2, SMRC ug iyang mga kaubanan, lakip na kang Tirado. Nasayran nga ang mga hintungdan nag atubang ug kasong murder nga nakadoket sa criminal case numbers; CC# 21736, CC# 8703-2013, CC# 10038-2016, CC# 05-2006 CC#10190-2016.
Apan, sumala sa opisyal, way suwerte kay inay motugyan sa ilang kaugalingon ngadto sa mga awtoridad, nakigpinusilay sila sa operating team. Apan sila si Mendoza ug uban pang kauban naka-eskapo, biniyaan ang patay nga lawas ni Tirado. Dugang gitin-aw ni Morales nga ang narekober nga mga gamit sa nahitaboan makasulti nga lehitimo ang operasyon.
Human ang panghitabo, narekober sa Kapolisan ug Kasundaluhan ang mga gamit sa Communist Terrorist Groups sa lugar ang usa ka improvised landmine; usa ka M16 rifle Elisco nga dunay serial number 075858 ug ang chamber gikargahan ug gisudlan og usa ka magazine nga nagbaton og 19 ka buhing mga bala, usa ka improvised tooter, duha ka way sulod nga sachets nga nagbaton og lama sa giingong shabu; 10 ka fired cartridge cases sa M16; ug usa ka camouflage nga short pants sa babaye.
Gisulti sa opisyal nga tataw kaayo nga ang ilang tropa di mogamit og puwersa kon way hulga sa ilang kinabuhi. Usa matud pa kadto ka lehitimong “encounter” ug di nila kontrol kon asa moigo ang mga bala. Sumala sa medico-legal, si Tirado naigo sa iyang tiyan nga bahin ug sa bukog sa paa, sukwahi sa alegasyon sa pamilya nga kinatawo niini napusgay sa bala.
