Giingon ni Zia Alonto Adiong nga posible matud pa nga may kalabutan sa impeachment proceedings batok kang Sara Duterte ang paglambigit sa iyang ngalan sa kontrobersiyal nga “maleta issue” nga naglakip sa 18 ka kanhi miyembro sa Marines.
Matud ni Adiong, ang iyang pagka-vocal critic sa kampo sa mga Duterte maoy posibleng hinungdan nganong nalambigit siya sa mga alegasyon. Nagtuo usab siya nga ang maong lakang mahimong “politically driven,” ilabina kay natunong ang isyu sa panahon nga gilauman ang pag-abli sa impeachment case sa Senado.
Nahinumduman nga niadtong miaging adlaw, nagpasaka si Adiong og Cyber Libel complaint batok sa 18 ka kanhi Marines didto sa Marawi City Prosecutor’s Office. Matud niya, pinaagi niini mahatagan og higayon ang mga akusado nga makapresentar sa ilang ebidensya kabahin sa alegasyong midawat siya og mga maleta nga puno sa kuwarta.
Gisalikway usab ni Adiong ang mga pasangil ug mipahayag nga wala pa siya sukad makakita sa giingong mga maleta nga adunay kuwarta nga gilambigit sa kontrobersiya.
Samtang, wala pa mitubag sa publiko ang kampo sa mga kanhi Marines kalabot sa Cyber Libel complaint ug sa mga pahayag ni Adiong. Ang maong isyu padayon nga gisubay samtang nagpadayon ang mga legal nga proseso ug ang diskusyon bahin sa impeachment complaint batok kang VP Sara Duterte.