Nakaawat ti gobierno probinsial babaen iti Provincial Resiliency Office ti nayun a donasyon manipud iti Office of the Civil Defense wenno OCD.
Segun ken ni local disaster risk reduction management officer Mr. Marcell Tabije, dagiti nasao a tulong ket maipaay kadagiti medical frontliners manipud kadagiti hospital ti gobierno ken dagiti institutional workers kadagiti isolation facilities iti intero a probinsia.
Inbunannagna a karaman ditoy ti 1,200 a KN95 masks, 1,000 a karton a imapulo a pedaso ti kada karton ti surgical facemasks, 1,000 a karton nga addaan ti limapulo a pedaso ti kada karton ti medical gloves, 1,200 a medical shoe covers, head covers, face shield, ken disposable surgical gowns, ken sangaribu a gallon ti alcohol.
Malaksid iti daytoy, impalgak ni Tabije nga adda pay ti 25 a bedside table, agarup 200 a rechargeable emergency lights, 200 a modular tent nga addaan ti maysa a katre, foam mattress, bed sheet, pungan, tugaw, lamisaan, ken electric fan a maibunong kadagiti hospital wenno pasilidad.
Nupay kasta, inlawlawagna nga iti agdama ket saan pay a nabigbig ti pakaipanana dagitoy a pasilidad. Imbatad ni Tabije nga iti immun-una a gundaway ket adda manen dagiti impaay ti OCD a generator sets, electric fans, ken PPES.
Malaksid iti daytoy, kunana a mangipapaay pay ti OCD ti sueldo ti siam nga institutional workers kadagiti isolation facilities pakairamanan ti pammigat, pangngaldaw wenno pangrabil, merienda ken mainom a danum para kadagiti pasiente ti COVID-19 ken dagiti medical frontliners sipud idi bulan ti Abril ita a tawen.
Innayonna a nagtalinaed ti gobierno probinsial nga aktibo iti pannakaipaay ti kasapulan dagiti medical ken dagiti dadduma pay a frontline workers iti probinsia kangrunaanna iti daytoy a panawen ti pandemia.
(Ronald Domingo, RPN DZRL Batac Correspondent)
(Source: Provincial Government of Ilocos Norte)