Cagayan de Oro City – Gikonpirmar ni Regional Director Mylah Faye Cariño sa National Economic and Development Authority, NEDA-10 nga moabot sa 9,672 ka mga establisimento sa Northern Mindanao ang nangayo karon sa sa assistance sa Department of Labor and Employment, DOLE-10 nga diin ang maong gidaghanon naglangkob sa 25.8% sa 37,412 ka mga negosyo sa entiro rehiyon 10.
Atol sa NorMin COVID-19 Response Task Force press conference sa miaging adlaw, gibutyag ni Director Cariño ang 36 ka mga negosyo ang nasira sa rehiyon ug 205 ka mga establisimento ang nagpakunhod sa ilang mga trabahante. Matud niya, kini nagpasabot nga 74% sa maong mga negosyo ang nilahutay pa ug maayo ang ilang dagan.
Sa kahimtang sa mga bag-ong negosyo sa Northern Mindanao, adunay 79 ang bag-ong narehistro nga mga korporasyon base sa data sa Securities and Exchange Commission. Kini nag-apil na sa trading, manufacturing, construction ug pamaligya sa personal protective equipment o PPEs. Usab segun sa data sa DTI nagpakita nga daghan sa mga existing handicrafts business ang namalhin na sa pagpanghimo sa PPEs ug face masks.
Sa pikas bahin, alang sa tourism-related businesses and Department of Tourism-10 naghatag na sa certificates of authority to operate ngadto sa 17 ka mga negosyo diin 4 niini naa sa Cagayan de Oro, 2 sa Misamis Oriental, 9 sa Bukidnon ug 2 sa Lanao del Norte.
Apan sa wa sila ni-operate, matud ni Cariño nga ila kining gisiguro nga ang maong mga negosyo nakacomply sa gikinahanglang permits sama sa DTI registration ug ang pagsunod sa health standard protocols nga gipatuman sa ilang operasyon. (Philippine Information Agency X)
