Adunay 879 grantees sa Provincial Youth Scholarship Program (PYSP) sa kagamhanang probinsyal sa Zamboanga del Norte ilawum sa administrasyon ni Governor Roberto Uy niining School Year 2020-2021.
Mao kini ang nasayran gikan ni Atty. Faith Penados, Executive Assistant IV ug ang kasamtangan PSYP Head sa kagamhanang probinsyal.
Ang maong scholarship program gitanyag sa mga magtutungha sa nagkalain-laing tulunghaan dinhi sa probinsya alang sa 4-year course ug 2-year course.
Kini mao ang Dipolog Medical Center, Saint Vincent’s College, Dipolog City Institute Of Technology, Andres Bonifacio College nga pulos ania nahimutang sa dakbayan sa Dipolog.
Lain na tulunghaan mao ang Jose Rizal Memorial State University-main campus sa dakbayan sa Dapitan, Dipolog ug Katipunan Campus.
Dugang ni Atty. Penados nga aduna usay mga magtutungha ang nakapahimulos sa Saint Mary’s Academy, Southern Peninsula College ug Southern Philippine College nga pulos anaa nahimutang sa lungsod sa Labason ning lalawigan.
Ang matag grantee makaangkon kini ug tag ₱ 10,000 alang sa 4-year course ug ₱ 5,000 alang sa 2-year course.
SI Atty Penados mipaklaro nga ang matag magtutungha kinahanglan magbato sa grado nga 80% pataas alang sa 4-year course ug 75% pataas alang sa 2-year course.
Nasayran nga daghan nang nakapahimulos sa Provincial Youth Scholarship program ni Governor Uy sukad paglingkod niini kaniadtong tuig 2013 ug daghan na usab ang nagmalampusan sa ilang pagtungha.
(Provincial Information Center – mbmontederamos)
