Hayan aduna nay makitang maayong resulta ang programa sa 4P’s sa Departamento sa Social Welfare Development (DSWD) dinhi sa Dipolog human gideklarar ug gipresentar ni Ms. Ma. Cleofe M. Solamillo, ang kasamtangang Provincial Link sa 4P’s , ang “Kilos Unlad” nga hini-usang giimplementar sa DSWD ug DepEd, diin makita ang “framework” sa “period of transition” sa usa ka miyembrong 4P’s nga nahimo nang “self-sufficient” nga makalahutay na sa pagtindog sa ilang kaugalingon nga dili na magsalig sa “cash transfer o grant” nga gihatag kanila sa gobiyerno.
Dinhi sa dakbayan sa Dipolog, aduna nay gikalatid nga 73 ka mga pamilyang 4P’s ang mo-gradwar sa Pantawid Pamilyang Pilipino Program (4P’s) sa DSWD gikan sa 7 ka tuig nga implementasyon sa maong programa, nga nagpasabut nga wala na sila’y mga anak nga nagpangidaron gikan sa 0 hangtud na sa 18 anyos, ug dili na usab sila makadawat sa cash transfer gikan sa DSWD. Gawas niini, nahimo na usab silang “self-sufficient” gumikan sa mga pagbansay nga ilang gipahimuslan gikan sa TESDA ug DTI, diin aduna na sila’y panginabuhi-an nga makasustener kanila sa ilang inadlaw-adlaw nga panginabuhi-an, samtang mipahimulos usab ang ilang mga anak sa mga “scholarship grant” nga gitanyag aron maka-eskwela sila sa kolehiyo, ug sa Livelihood Assistance Grant (LAG) nga gitanyag sa DSWD ug sa Kagamhanang Lokal sa Dipolog.
Dugang niini, gipasabot usab ni Ms. Solamillo nga kining 73 ka mga pamilyang 4P’s nga mogradwar ang moagi ug monitoring sa DSWD sa ilang kahimtang aron dili na sila mobalik sa ilang pagka- uyamot. Sumala pa ni Solamillo, ang implementasyon sa 4P’s sa milabayng 7 na ka tuig karon mao ang pagtabang sa mga uyamot nga makalabang sila sa ilang kapobrehon pinaagi sa “behavioral change”, pag-umol kanila nga mamahimong responsableng ginikanan sa ilang mga anak, ug mamahimong hamogaway ang ilang kinabuhi, gawas sa “cash transfer o grant” nga ilang madawat matag bulan alang sa upat nga gidaghanun nga ilang anak. Ang pito (7) ka tuig nga “transition period” igo-igo na nga panahon nga makahatag kanila ug ta-as nga lebel sa ilang kinabuhi.
Gikalatid nga ang seremonyas sa pag-gradwar sa 73 ka mga pamilya ang gitakda karong umaabot Hunyo ning tuig 2021.
Mipasalamat si Ms. Solamillo lakip na ang DSWD city link in-charge nga si Ms. Rose Dale Mangubat ngadto kang Mayor Darel Dexter T. Uy sa Kagamhanang Lokal sa Dipolog, ngadto sa makanunayung tabang ngadto sa mga pamilyang 4P’s ilabi na sa mga libreng bansay-bansay ug ayuda nga ilang gitanyag aron mamahimong hamogaway ang ilang pangibuhi-an sa dugang kita nga makuha nila human sa ilang mga bansay-bansay. (CIO-prr)