Sa tinguha nga mahunong ang pagkuyanap sa African Swine Fever (ASF) sa syudad ilabina sa uban pang mga barangay, mokabat sa 72 ka mga baboy sa Barangay Mambuaya ang gi-cull kagabii, Pebrero 10, 2021.
Kini human adunay pagkamatay sa mga baboy sa maong dapit ug nakumpirma nga apektado sa ASF virus ang mga baboy base sa laboratory result sa dugo nga nakuha gikan sa maong mga baboy ug gideklara usab sa Department of Agriculture (DA-10) nga positibo kini sa ASF.
Gipasabot sa mga kadagkuan sa DA nga ang 72 ka mga baboy nakasulod sa 100-meter radius gikan sa red zone o sa dapit nga adunay na-record nga pagkamatay sa mga baboy.
Ang pag-cull sa mga baboy gihimo sa Incident Management Team sa City Disaster Risk Reduction and Management Department pinangulohan ni Officer-in-Charge Nick Jabagat, City Engineering Office, City Veterinary Office, City Police Office, ug military personnel.
Gilubong dayon ang gipang-cull nga mga baboy sa usa ka isolated area sa maong barangay lakip na ang mga materyales nga gigamit uban sa supervision sa lisensyadong veterinarian.
Si City Veterinarian Dr. Lucien Anthony Acac namahayag nga ang 24 ka apektadong swine raisers ang makadawat og P5,000 gikan sa DA-10 sa matag baboy nga gi-cull ug dugang ₱ 2,000 gikan sa syudad.
Siya mipadayag nga matag apektadong hog raisers makadawat og compensation basta motuman sa mga requirements nga gi-set sa DA.
Gihangyo usab ni Dr. Acac ang mga hog raisers nga mosunod sa mga measures nga gipatuman sama sa dili pagpagawas og mga baboy paingon o gikan sa apektadong barangay.
Nunot niini, gimugna ang mga teams nga gilangkuban sa Movement Control aron masiguro nga walay movement sa mga hogs sa mga apektadong lugar, indemnification team alang sa documentation ug recording sa mga apektadong hog raisers, depopulation and disposal team nga gilangkuban sa mga veterinarians ug agriculturists, disinfection ug surveillance team aron magpadayon ug mapalig-on ang monitoring sa posible nga bag-ong mga kaso sa maong dapit. (City Veterinary Office)
