Cebu City – Gitakdang ipaubos sa mass swab testing ang labing minos 700 ka manindahay mercado publiko sa dakbayan sa Mandaue.
Suma pa sa executive secretary ni Mayor Jonas Cortes, Atty. John Eddu Ibañez, napadalhan na sa EOC o Emergency Operations Center og suwat ang mercado bahin sa plano.
Matod ni Ibañez, buot lang nilang masuta ang kahimtang sa panglawas sa mga vendors alang sa ilang kaluwasan ug sa mga pumapalit.
Midugang si Ibañez nga gusto usab nila nasayran kon wa bay gi-covid sa mga manindahay aron ila dayong maaksyonan.
Hinuon, wa pa madesidihi unsang adlawa ug petsaha ipahigayon ang mass testing sanglit gi-finalize pa sa EOC ang guidelines ug protocols.
Sa iyang bahin, si Atty. Lizer Malate, pangu sa EOC, miingon nga ‘by batch’ ang pagpahigayon sa test sa mga vendors sa mercado.
Gipasabot ni Malate nga hut-ong-hut-ong ang pag-swab test sa mga manindahay aron dili mabalda ang operation sa public market.
Samtang ang usa sa mga vendor nga si Ellibet Lumapas mipadayag nga suportado niya ang maong lakang sa siyudad. (Jhon Tadlip/JTY)
(Source: Mandaue City – Public Information Office)