Medina, Misamis Oriental – Trahedya ang nahitabo gabii sa adlawng Biyernes, Setyembre 26, 2025, human makit-an ang lawas sa usa ka 7-anyos nga batang lalaki nga naglutaw daplin sa suba sa Barangay Cabug, Medina. Ang biktima nailhan nga si Donard, residente sa Barangay North Poblacion, Medina.
Base sa inisyal nga imbestigasyon, pasado alas-5:00 sa hapon nangayo og pagtugot si Donard sa iyang inahan nga si Chuna, 44 anyos, aron mokuyog sa balay sa silingan ug magduwa. Apan, wala na kini nakauli hangtod alas-6:00 sa gabii. Sa pagpangita sa inahan, gisulti sa silingan nga wala na nila mabantayi nga mipauli ang bata.
Gilayon nga nangayo og tabang ang inahan sa mga silingan ug barangay opisyal. Sa dihang gipangita, nadiskubrehan nila ni Kagawad Marcelino Ipanag ug Avelino Indat ang lawas sa biktima nga naglutaw sa suba.
Pag-abot sa mga personahe sa Medina Municipal Police Station pinangulohan ni PMSG Roger Lumapas ug sa RHU Physician Dr. Erlene Grace S. Boter, gideklarar nga wala nay timailhan sa kinabuhi ang biktima alas-11:00 sa gabii.
Karon, giapahulay na, ang lawas sa bata.