CAGAYAN DE ORO CITY- Gibutyag sa mga health officials sa syudad sa Cagayan de Oro nga mopailawom kagahapon sa Mass Covid-19 antibody test ang moabot 500 ka mga residente sa barangay Carmen. Kini libre gitunol sa gipangpili na daan nga mga individual, suma sa City Health Office.
Ang Barangay Carmen mao ang adunay pinakataas nga Covid-19 cases sa Cagayan de Oro diin adunay pito ka kaso niini ug tulo ang namatay gikan niadtong bulan sa Abril. Gihimo ang maong mass testing sa Carmen Barangay Hall.
Ang lakang gihimo human sa usa ka 44 anyos nga babayeng cashier sa nagbaligya sa electronic and lighting supplies gikan sa Barangay Agusan ang nasuta nga positibo sa Covid-19. Sumala pa ni City Epidemiologist Dr. Joselito Retuya nga ang maong cashier nabaw-an nga positive pinaagi sa RT-PCR tests nga gihimo sa Northern Mindanao Medical Center.
Sa pagkakaron, upat na ka miyembro sa ilang pamilya ang gipailawom sa quarantine sa city isolation facility sa barangay Lumbia. Ang nasangpit nga 44 anyos mao ang ika-12 nga active Covid-19 case nga narecord sa Cagayan de Oro.