Cebu City – Gibutyag sa Department of Education (DepEd) 7 nga mokabat ug 50 ka mga pampublikong tunghaan sa Central Visayas ang andam na sa face-to-face classes, human sa kapin sa usa ka tuig nga pagpahigayon ug blended learning classes taliwa sa gi-atubang nga pandemiya.
Matod ni DepEd 7 Regional Director nga Salustiano Jimenez wala hinoon pa silay timeline kung kanus-a sila mosogod niini.
Sigon pa ni Jimenez nga mag depende sa Central Office ug kang Presidente Duterte pag approve sa ilang rekomendasyon.
Lakip sa mga rekisitos aron matugtan ang usa ka tunghaan alang sa in-person classes mao ang mga mosonod: desinyo sa classroom ug pagbutang sa health protocol;
Nagkinahanglan sab kini ug rekomendasyon gikan sa Department of Health, local governments, school divisions, parent-teachers association ug uban pa.
Nagkanayon si Jimenez nga daghan nang mga tunghaan ang naka tuman sa mga rekisitos apan 50 lang ang girekomenda nga malakip sa unang hugna nga tugtan sa in-person classes.
Dunay unom ka mga tunghaan nga gi rekomenda sa lalawigan sa Bohol, siyam sa Siquijor, 13 sa Negros Oriental ug 22 ka mga tunghaan gikan Probinsya sa Sugbo.
Sa Sugbo, gilangkoban kini gikan sa highly urbanized cities sa Cebu, Mandaue ug Lapu-Lapu.
Gipahibaw ni Jimenez nga ang kasamtangan nga school year matapos sa Hunyo 2021 ug ang early registration alang sa sunod nga ting tungha nagsugod sa Marso 26 hangtud sa Abril 30.
Ang early registration magtotok sa mga magpa enroll nga tinun-an sa kindergarten ug sa grade 1 hangtud sa 7 ug sa Grade 11.
“We’re also doing this so that the schools can count how many classrooms, supplies and teachers that are needed,” pasabot ni Jimenez.
Pinaagi sa sayo nga pagpa enroll, matod pa sa director nga maka tabang kini sa DepEd-7 pag ila ug pagtultol sa learners living with disabilities; kadtong nagpuyo sa off-grid areas, o kadtong nagpuyo sa mga hilit nga lugar ug nagpoyo sa barangay nga way tunghaan;
Masuta sab niini kung kinsa ang apektado sa kalamidad; mga naa sa lugar nga dunay kagubot; mga biktima sa child abuse ug economic exploitation; ug kadtong wala na magtungha nga gustong mobalik sa pag eskwela ug uban pa. (Jhon Tadlip/JTY)
(Source: Department of Education 7, photo courtesy by Rowena Tadlip-Ochea)
