Malipayong gipahibalo ni konsehal Suzette Magtajas-Daba sa katawhan sa dakbayan nga taliwala sa nasinating pandemya ang kagamhanan padayong naghatag og kaarangan sa natad sa edukasyon.
Gitumbok sa konsehal ang pagtukod og mga lawak saringan diha sa mga kabarangayan sa syudad uban sa pag-abag sa buhatan sa Department of Education (DepEd).
Sa accomplishment report nga gisumete ni City Engr. Rolando Pacuribot atol sa tigom sa Local School Board (LSB) sa miaging adlaw sa pangunguna ni City Schools Division Superintendent Cherry Mae Limbaco, moabot na sa 480 ka classroom ang nakompleto ug dugang 285 ka mga lawak saringan ang padayong gitukod.
Akong kalipay nga ipahibalo sa katawhan nga hapit na mahuman ang gipabarog nga mga gambalay sa nagkadaiyang barangay sama sa 45 classroom, 4-storey with ramp sa Pedro “Oloy” N. Roa National High School; 48 classroom, 4-storey with ramp sa Kauswagan National High School; 28 classroom, 4-storey with ramp North City Central School; 42 classroom, 4-storey with roof deck & ramp sa Cugman National High School; 52 classroom, 4-storey with ramp sa Bulua National High School ug 5-storey, 52 classrooms sa City Central School, Girls Scout of the Philippines (GSP) ug  City Public Library matud pa ni Konsehal Daba.
Dugang pa, gisugdan na ang proyekto sa pagtukod og bag-ong gambalay alang sa 12 ka lawak saringan diha sa Baikingon National High School sa tinguha nga walay kabataan nga mapihig sa de kalidad nga edukasyon. (Sangguniang Panlungsod – CdeO)