Gihulat karon sa konseho ning syudad sa Gensan ang mamahimong tubag ni Gensan City Mayor Ronnel Rivera ug City Legal Officer Atty. Armando Clarin may kalabutan sa resolution nga gipasa ug giaprobahan sa tibuok Sanguniang Panlungsod aron ipakanselar ang mga titulo sa yuta nga nasulod sa Presidential Proclamation no. 1216 kon 400 kapin ka ektarya sa Sitio View, Barangay Tambler ning syudad sa Gensan.
Ang maong sugyot balaudnon ang gipasar ni City Councilor Rosalita Nunez nga nagkanayong hangyuon ang Mayor ug City Legal Officer nga mohimo ug legal action aron mabawi ang maong yuta ug magamit isip relocation site sa LGU Gensan sa mga tawong kabus sa syudad kon homeless and lotless urban poor.
Matud pa ni Nunez nga ang maong yuta giplanuhan sa syudad panahon nga Mayor pa kini aron mahimong economic zone apan wala na kini madayon sa dihang giangkon ug gipatituluhan sa mga dagkong negosyante . Mikabat na sa 200 kapin ka mga titulo ang nahimo sa mga pribadong claimant sa maong yuta ug wala gayud napahimuslan sa LGU Gensan.
Tumong sa lakang sa syudad ang ipasaka ang maong hisgutanan sa SOLGEN kon Solicitor General aron mapakanselar ang titulo ug mabawi ang maong yuta.
Mamahimo kining legasiya matud pa sa kasamtangang administrasyon aron mapahimuslan sa mosunod nga henerasyon ang maong yuta nga gituyo paghatag sa nasudnong pangkagamhanan alang sa katawhan sa syudad ug mapahimuslan sa molupyo niini.
Wala pa hinuon gipanganlan ni Nunez ug kinsang mga dagkong negosyante ang nakapahimulos niini karong panahona nga matud pa mokantidad na ang matag ektarya sa yuta ug kapin 100 milyones ka pesos .( Roniel Degorio)