MISAMIS ORIENTAL – Upat ka indibidwal ang nadakpan sa sunod-sunod nga operasyon sa kapulisan batok sa iligal nga sugal nga “swertres” sa lalawigan sa Misamis Oriental ug dakbayan sa Cagayan de Oro kaniadtong Oktubre 2 hangtod 3, 2025.
Unang nadakpan alas 10:50 sa buntag sa Purok 4, Barangay Consuelo, lungsod sa Magsaysay, Misamis Oriental ang 60-anyos nga si Sergio, residente sa maong lugar. Nasakpan siya sa mga operatiba sa PIU MisOrPPO, Magsaysay MPS ug RSOU-10 nga nagapangolekta ug pusta alang sa iligal nga swertres.
Sa kaparehong adlaw, alas 1:18 sa hapon, dakop usab si Lydia, 57 anyos, residente sa Barangay Camaman-an, Cagayan de Oro City, atol sa gihimong Oplan Bolilyo sa Cogon Market Complex, Barangay 33.
Samtang niadtong Oktubre 3, 2025, nadakpan usab sa duha ka laing operasyon sa Barangay Carmen, Cagayan de Oro City ang duha pa ka suspek. Una nga nadakpan alas 7:01 sa gabii mao si Jepie, 37 anyos, minyo, taga-Zone 10, Upper Carmen.
Gisundan kini alas 8:15 sa gabii sa pagpangdakop kang Vanrobert, 31 anyos, taga-GK BDO, Barangay Calaanan. Nasakmit gikan sa iya ang mga resibo, kwarta, ug tally sheet nga nagpakita sa kalihokan sa iligal nga swertres.
Ang mga operasyon gipangulohan sa mga operatiba sa CMFC Intel Operatives, Police Station 4, ug mga kapulisan ubos sa direktang pagdumala ni PLtCol. Arvies V. Altiche, PCpt. Jubert O. Bagaporo, ug PMaj. Gerard Paul P. Duran.
Ang tanang nadakpan gi-detain ug kasong paglapas sa Republic Act 9287, o ang balaod nga nagapahugot sa silot batok sa iligal nga numbers game, ang gisang-at batok kanila.