General Santos City – Dili matukib ang gibating kalipay ug pasalamat sa 3,527 ka mga registered senior citizens o mga lolo ug lola ning dakbayan sa Gensan human sila midawat og tag-P2,000 pesos nga Birthday Gift Incentives (BGF) sa buwan sa Septembre 2024, gikan sa lokal nga gobyerno ning s’yudad sa General Santos.
Mismo gayud si Gensan City Mayor LORELIE PACQUIAO kaabag ang nahintungdang buhatan sa City Hall maoy nanguna sa distribusyon sa tag-P2,000 birthday gift incentives sulod sa 2 ka adlaw nga gilusad sa usa sa mga dakung mall ning dakbayan.
Unang nahatagan sa maong kantidad ug sa maong katuyo-an ang naha-unang 1,869 ka mga katigulangan ning nakalabay’ng adlaw ug gisundan kini sa lain pang 1,658 ka lolo ug lola kagahapong adlawa sa susamang lugar.
Kahibalo-an nga ang paghatag sa tag-P2,000 pesos nga birthday gift incentives sa mga katigulangan sa GenSan usa na kini ka lokal nga balaud sa s’yudad sulod na sa pipila ka tuig, nga bisan kinsa pa ang mopuli nga Mayor sa Gensan, magpadayon ang maong programa alang sa nasampit nga hut-ong.