Nagpahigayon na og motu proprio nga imbestigasyon ang General Santos City Public Terminal Administration batok sa 34 ka mga tricycle drivers nga nalambigit sa “over pricing” o sobrang pagpaningil sa ilahang pasahero.
Sa pakighinabi sa RPN DXDX ??????, gisaysay ni Terminal Administrator Restituto Facurib nga ilaha nang giandam ang mga ebidensiya ug formal complaints batok sa mga nahisgutan, diin posible matod pang mabakwian og prankisa ang mga nasampit.
Dugang pa sa opisyal, positibong gitudlo sa mga pasahero ang maong mga drayber, kansa, sobra matod pa ang singil sa pamasahe gikan sa Bulaong Terminal.
“Identified na sila, pwede nako nganlan bawat isa. Motu propio gina-prepare na nato ang tanang ebidensiya batok kanila,” ang tipik sa pamahayag ni Facurib.
Alayon niini, giawhag usab ni Facurib ang uban pang mga pasahero nga biktima sa bentahusong mga drayber nga makig-alayon sa ilahang buhatan aron hingpit nga mapasaka ang kaso.
Sa pagkakaron, aduna nay gipaskil nga “taripa” sa terminal aron maoy mamahimong sumbanan sa angayng singil sa pamasahe sa mga tricycle. (John Rey Somido)
