Cebu City – Gipadayag ni Lapu-Lapu City Mayor Junard Ahong Chan ang iyang kagool sa sitwasyon sa mga abandoned children sa Homecare Facility nga naigo sa Covid-19 virus.
Sa iyang Facebook post, matod ni Chan nga dunay 32 ka mga minors nga naa sa maong facility sa Barangay Gun-ob, ang tested positive sa maong virus.
“Nakabati ko og dakong kahadlok kay ang COVID karon moigo na sa mga kabataan nga lahi sa miaging tuig,” mensahi ni Chan.
“Sila ang mga kabataan nga wala na gyuy mga ginakanan ug walay masampit nga Mama ug Papa kung sila masakit,” dugang mensahi sa mayor.
Kagahapon, Lunes, Agosto 9, personal nga mibisita ni Chan ang kabataan sa pasilidad aron paghatag sa ilang mga panginahanglan.
Uban sa mayor ang doktor nga mihatag ug instruction kung unsay angayan buhaton sa higayon nga duna silay mga balatian samtang anaa ra sa sulod.
Gihatagan sab ang mga kabataan ug lain-lain vitamins aron ma boost ang ilang immune systems ug aron mapadali ang ilang pag recover.
Miabag ug gipasalamatan sa mayor ang pangu sa City Social Welfare Development Office Head Annabeth Cuizon, City Disaster Risk Reduction Management Office Head Nagiel Banacia, City Health Head Dr. Agnes Rializa ug City Hospital Administrator Dr. Ronald Oporta.
“Sa atong mga Homecare Children, ayaw kamo pagduhaduha sa pagsampit kanako kay anaa ra ko pirme sa inyung kiliran. God bless kaninyung tanan ug unta maayo na mo,” pasalig sa mayor. (Jhon Tadlip)
(News & photos courtesy of Junard “Ahong” Chan Facebook account)