Cebu City – Gitakdang ipaubos sa drug test ug driving test ang 300 ka drayber sa Ceres bus nga nadestino sa CNBT o Cebu North Bus Terminal nunot sa kutay sa mga aksidente sa dalan nga mikalas og kinabuhi.
Sa miaging adlaw,si Director Eduardo Montealto sa Land Transportation Franchising and Regulatory Board o LTFRB 7 miingon nga ang mga drayber nga mahagbong sa test nga himoon sa Land Transportation Office o LTO 7 dili na makamaneho og bus ug ubang de pasahero.
Samtang kadtong makapasar, ipaubos pa sa refresher training labot sa defensive driving nga pasiugdahan sa LTFRB 7.
Hinuon, gitataw ni Montealto nga ila pang i-finalize ang  schedule sa test ug ang ilang coordination sa ubang ahensiya sama sa LTO 7.
Matod niya, makigtagbo pa sila sa kadagkoan sa Vallacar Transit Inc., ang operator of Ceres bus, ug satulo ka drayber nga nalambigit sa aksidente karong semanaha.
Karong Martes, Nob. 3, gitakda ang ilang dialogue labot sa panagbangga sa Ceres bus ug sa pribado nga ambulansiya niadtong Okt. 25 nga mikalas og duha ka kinabuhi.
Unya pagkasunod adlaw ilang tukion ang pagkaligis-patay sa guwardiya nga nagbisikleta sa Mandaue City sa miaging Biyernes ug sa laing nag bisikleta nga namatay pod pagka Sabado sa Pitogo Consolacion.
(Jhon Tadlip/ JTY, photo courtesy by Bryan Siacor | Cashakoh Choo | CCDRRRMO, Ramil Ayuman)
(Source: LTFRB 7)