Tulo ka proyekto sa imprastraktura ang gipaabot nga mapatuman sa duha ka mga barangay sa distrito 1 sa dakbayan sa Cagayan de Oro.
Kini human giduso ni bise mayor Kikang Uy ngadto sa komite sa panalapi ni konsehal Edna Dahino ang sugyot ordinansa nga maghatag og katungod ni mayor Oscar Moreno pagpirma sa Memorandum of Undertaking (MoU) tali sa Department of Public Works and Highways (DPWH) – Cagayan de Oro City 1st District Engineering Office nga naglangkob sa pagpatuman sa mga proyektong farm to market road (MFR).
Ubos sa maong sugyot ordinansa, ang nahisgotang mga proyekto naglakip sa gilaraw nga pagsemento sa Dansolihon FMR, Tignapoloan FMR ug dalan sa Sitio Magayad, Tignapolaon nga mobalor og P39 milyones kapin.
Sa gisugyot nga MoU, ang DPWH mogahin og P36 milyones samtang ang dakbayan mogahin usab og ₱ 3.6 milyones isip paatbang pundo. Kini maglangkob sa sa 10 porsyento (10%) sa kinatibuk-ang gahin.
Ang pagalagdaang kasabutan nunot sa tinguha sa gobyerno nga matunol ngadto sa katawhan ang gikinahanglang fasilidad nga maghatag og kasayon sa katawhan sa dapit dinha sa pagbyahe sa ilang mga produkto gikan sa kabukiran paingon sa sentrong bahin sa syudad.
Si konsehal Edna Dahino, sa sesyon sa konseho kagahapon, mipasabot nga gikinahanglan nga matino ang tinubdan sa pundo nga magamit sa pagpatuman sa proyekto.
Hinuon, siya malaumon nga sa padayong kolaborasyon sa dakbayan ug sa nasudnong gobyerno maangkon gayud ang gidamgong kauswagan ug kaarangan sa kinabuhi sa katawhan.
(Sangguniang Panlungsod – CdeO)