Ang buhatan sa Bjmp Dipolog City Jail Male Dormitory, mipahigayon ug usa ka 3-in-1 Program sama sa read-a-book session, feeding program, ug gift-giving alang sa mga bata sa Carmelite Home, niadtong Mayo 16, 2024 sa alas 12:30 ang takna sa udto, didto sa Sicayab ning dakbayan sa Dipolog.
Kini nga inisyatiba ubos sa pagpangulo ni CINSP ARVIN DAN R AGUITO, City Jail Warden, kauban ang unom ka mga personahe sa maong pasilidad diin 26 ka mga bata ang naka benipisyo sa maong programa.
Sa maong programa,si SJO1 Sheila B Dela Victoria, Unit CRSO mibasa og istorya mahitungod sa pagkamasinugtanon, nga naghatag og gibug-aton sa kamahinungdanon sa mga bata nga motuman sa ilang mga ginikanan, mga tigulang ug mga madre sa pag-atiman kanila, samtang si JO3 Maryflor M Labial, Food Processor Supervisor, mipaambit og istorya mahitungod sa mga hiyas sa pagpaambit sa mga kabos.
Isip bahin sa maong programa, gihatagan ang mga bata og mga pakete sa Jolly Spaghetti, egg sandwiches ug fruit juice ug usa ka kahon sa goodies aron ipaambit sa mga kabataan, diin kini dungan sa pagpasalamat ug pagsaulog sa adlaw nga natawhan ni JO1 Apple Jhoy S. Belotindos-Eguia ug kauban ni Miss Ylan Gabrielle B. De la Victoria kinsa nga migahin usab ug goodies ngadto sa mga bata sa pag selebrar usab sa iyang adlaw nga natawhan niadtong Mayo 16.
Nunot sa maong programa,ang Bjmp Dipolog CityJail MaleDormitory, nipadangat sa ilang kinasingkasing nga pasalamat sa mga nagpaluyo sa maong programa. (Medalyn U. Borja)
(Source: Bjmp Dipolog City Jail Male Dormitory)