“Ayaw usiki ang blessings nga gihatag sa Ginoo, kay para na sa pag-improve sa inyong education, sa inyong family ug sa inyong future”, kini ang tipik sa mensahe ni Mayor Darel Dexter T. Uy ngadto sa ika-duha nga batch sa Dipolog City Scholars atol sa pagpinirmahay sa Scholarship Agreement ug sa susamang higayon mao usab ang orientation sa nasangpit nga mga grantees.
Si Mayor Uy, mao ang utok aron mahimugso ang Ordinance No. 22-324 o nailang City Scholarship Program diin ang pagpasar niini ang gipangamahanan ni konsehal Marilou Y. Calibo ug gi-aprobahan sa konseho sa dakbayan sa pagpangulo ni Bise-Mayor Atty. Senen O. Angeles .
Base sa Ordinansa, adunay 30 ka mga grantees ang nakapahimulos sa tag Php20,000.00 samtang 40 usab ang nahatagan sa Php7,000.00 financial assistance matag semester kon sila makamentinar sa grado nga 85% o pataas.
Si King Enzo Tayrus, lumulopyo sa Brgy. Estaka, nagtungha sa Dipolog Medical Center ug nikuha sa kursong Medical Technology, ang nipadangat sa iyang dakong pasalamat ngadto ni Mayor Uy ug sa tanang nagpaluyo sa nahisgutan nga scholarship program tungod kay natabangan niini ang mga kabus nga magtutungha nga makapadayon sa ilang pagtuon sa kolehiyo.
Ang Dipolog City Scholarship Program ang unang na-implementar niadtong tuig 2022 diin susamang gidaghanan sa mga scholarship grantees ang naka-avail niini.
(Source: Dipolog City Government Facebook page)