30.2 C
Manila
Sunday, April 21, 2024

29 Ka Mga Lugar Sa Central Visayas Gideklarar Nga Election Hot Spots

- Advertisement -

Palig-onon sa AFP ug sa PNP ang presensya niini sa 29 ka mga lugar sa tunga-tungang kabisay-an nga gideklarar nga election watch list areas (EWAs) pinasikad sa mga nahitabong election-related incidents sa nakalabay’ng mga katuigan.

Pito ka mga dapit sa Sugbo ang apil sa gitumbok nga election hot spots nga naglakip sa dakbayan sa Sugbo, Mandaue City, Lapu-lapu City ug Danao City ug usab ang mga kalungsuran sa Ronda, San Fernando ug Tuburan.

Matud sa pangulo sa Police Regional Office sa Central Visayas (PRO-7) Chief Supt. Debold Sinas nga gideklarar ang nahisgutang mga dapit isip election hot spots tungod sa nakalabay nga election-related incidents ug grabeng political rivalry. Gipasabot hinuon ni Sinas nga walay dapit sa Central Visayas nga nabutang ubos sa red category sa mga gideklarar nga election hot spots. 

Ang ubang mga dapit nga apil sa 29 ka mga election hot spots  sa Central Visayas naglakip sa napulo ka mga lugar sa Negros Oriental, unom sa Bohol ug unom usab sa lalawigan sa Siquijor. Pinasikad sa criteria sa PNP ug COMELEC ang Election Watch List Areas (EWAs) gibutang sa tulo ka mga katergoriya; yellow category, orange category ug red category.

Sa iyang bahin si Cebu City Vice Mayor Edgardo Labella kinsa kandidato sa pagka-mayor sa sunod tuig nga eleksiyon batok kang incumbent  Mayor Tomas Osmena mihangop sa pagkalakip sa dakbayan sa Sugbo sa EWAs list. Matud ni Labella gitahud niya ang assessment nga gihimo sa kapolisan ug sa mga election officials busa andam nila nga sundon ang rekomendasyon niini.

Gihangop usab ni Mandaue City Mayor Gabriel Luis “Luigi” Quisumbing ang pagkalakip sa Mandaue City sa EWAs list. Gipanghinaot ni Quisumbing nga mawad-an unta sa kadasig ang mga organized groups ug drug syndicates sa paghimo og mga kagubot ug uban pang krimen nga mahimong makatandog sa umaabot nga 2019 elections.

Wala makahatag sa iyang komentaryo ug reaksiyon si Mayor Tomas Osmena labot sa maong isyu kay atua pa man sa Hong Kong ang mayor.

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -