Nadakpan sa gilusad na hot pursuit operation sa mga personahe sa Theft and Roberry Unit sa Surigao City Police Station batok sa 28 anyos na suspek nga diin nadakpan isab kaniadto 2016 sa krimeng robbery.
Sumaya pa sa biktimang si Michael Morit Balbadores, 39 anyos na layaki, empleyado sa Provincial Government, residente sa Purok Santan Talipapa, Espina Extension, Barangay Taft, siyudad nan Surigao ija gibutyag mga alas 11:30 sa buntag kagahapong adlawa, niabot sja sa ija bayay ug nadiskubrehan nija nga naguba na an padlock sa main door. Pagsuyod nija, naguba isab an padlock sa ija kwarto ug gubot an suyod ug abri na an durabox.
Nawagtang na an itom nga KKSK Powerbank 10000mah nga nagkantidad ug Php500.00; blue Oppo F11 android phone nga nagkantidad ug Php6,000.00; blue nga Huawei 6Pro nga nagkantidad ug Php7,000.00; puti na wave phone nga nagkantidad ug Php3,500.00; pito kabuok na wrist watch nga nagkantidad ug Php7,000.00 ug gituohang gikawat sa waya mailhing tawo.
Base sa kopya sa CCTV footage nga gidaya sa biktima nga gikuha sa bayay sa silingan, nasayran nga mga alas 10:31 sa buntag kagahapong adlawa, jaoy isa ka layaki nga wala makilay.i na tawo nga nisuyod sa bayay nan biktima, nagsuot ug itom na kalo, puya na t-shirt, itom/berde na tabla na mubo, nga jaoy itom na backpack, gibanabana nga edad tali sa 25 ngadto sa 30 ka tuig an edad.
Nagpahigayon ug pursuit operation an mga sakop sa Theft and Robbery Unit sa Surigao City CPS batok sa suspek nga miresulta sa pagkasikop niini. Giila an suspek na si Joshua Heaven Yu, 28 anyos, layaki, ulitawo, high school level, construction worker ug residente sa Purok 9, Barangay Canlanipa, Surigao City.
Nakuha gikan sa posisyon sa suspek amo an isa ka itom na Jansport backpack nga jaoy suyod sa nahisgutang mga butang nga kinawat ug isa ka itom nga screwdriver nga gituohang gigamit sa suspek sa pagguba sa safety hasp ug padlocks. Nahitabo an pagkasikop mga alas 3:30 sa hapon jadton Hulyo 31, 2024 sa Purok 9, Barangay Canlanipa, Surigao City.
An dinakpan na suspek gipahibyo sa ija konstitusyonal nga katungod ubos sa Miranda Doctrine ug Anti-Torture Law ug gidaya sa Surigao City CPS iban an mga nakuhang ebidensiya alang sa dokumentasyon ug disposisyon.
(Mark James Lisondra)