DEAD on Arrival sa balay tambalanan ang usa ka batan-ong lalaki human mabangga ang gimaneho niining motorsiklo sa usa ka pampasaherong Bus sa may District 3, San Jose Talisayan Misamis Oriental karong gabii, February 6, 2025.
Biktima driver sa motor nailang si Ryan Rose “Macmac” Galario Sta Rita, 22 anyos, ug lumulupyo sa Purok 5 sa nahisgotang lugar. Samtang ang driver sa bus mao si Mariano Sitoy Boquil, 42 anyos, minyo, ug residente sa San Rafael, Prosperidad, Agusan del Sur.
Matud ni Talisayan Municipal Station Investigator on Case PCMS Eric Nerio Bahia nga base sa ilang inisyal nga imbestigasyon nga padulong sa Cagayan de Oro ang direksyon sa Bus nga Bachelor Express samtang Gingoog ang direksyon sa biktima nga nagmaneho sa Yamaha Mio nga motorsiklo.
Saysay matud pa sa driver ug konduktor nga migiwang-giwang ang dagan sa motor nga gimaneho ni Sta Rita hinungdan nga mipasok kini ilawom sa maong bus. Dugang pa niini nga dako ang impact sa maong aksidente diin nahabwa matud pa ang pipila ka mga internal organs niini sa tiyan nga bahin.
Nadala pa kini sa MOPH-Talisayan apan gideklarar kininh dead on arrival sa nag-atimang doctor. Nakahiagom sa dakong samad ug bun-og sa nagkadaiyang parti sa kalawasan ang biktima hinungdan sa hinanali niining kamatayon.
Sa pagkakaron, anaa nakakostudiya ang driver nga si Boquil sa Talisayan MPS ug possibleng mag-atubang sa kasong Reckless Imprudence Resulting in Homicide.