El 53rd Infantry Battalion (53IB) ya dale reconocimiento con un soldao y cuatro milicianos por el reciente confiscacion del P11.1 millones valor de contrabando na provincia del Zamboanga del Sur, asegun con el militar del Jueves. Asegun con el 4th Civil Relations Group (4CRG), si Teniente Coronel Rolando Vargas, Jr., el comandante del 53IB, ya encabesa con el ceremonia de reconocimiento del Lunes na Campo Major David Sabido, que ta servi como el casa del cuartel del mando na Barangay Poblacion, Guipos, Zamboanga del Sur. Asegun con el 4CRG, si Vargas ya presenta un Plaque de Reconocimiento con Staff Sergeant Allan Eribuagas por su excepcional y inquebrantable dedicacion na su trabajo. El 4CRG ya habla, el esfuerzos de Eribuagas durante el operaciones conjunta de control, o checkpoint, na Barangay Tiguma, ciudad de Pagadian, del Enero 30, ya resulta na confiscacion del 194 cajon de smuggled cigarillo con el valor de P11,116,200. “Su vigilancia y integridad signficamente ya contribui para mantene orden y seguridad publica, reflejando el mas alto tradiciones de servicio militar,” el 4CRG ya habla na un anuncio. Certifico de Reconocimiento para el de ila participacion na exitoso operacion ya presenta tamen con mga milicianos identificao como el mga siguientes Bonifacio Sumandoran, Jusel Urot, Kenneth Bualat, y Montino Sayanon. Si Eribuagas ya expresa su gratitud por el recognocimiento y ya reafirma su dedicacion con el mision del 53IB. (B. Garcia) (Photo Courtesy of 53IB)