Ya muri el hefe del civilian volunteer organization (CVO) despues que ya tira conele na municipio de Kumalarang na provincia del Zamboanga del Sur.
Si Coronel Diomarie Albarico, el Zamboanga del Sur police director, ya nombra con el victima como si Florentino Linuag, el hefe del CVO na Barangay Diplo, municipio del Kumalarang.
Asegun con Albarico cay con Linuag alegaomente ya tira si Robert Dumagat maga alas tres kinse del Miyercoles tarde alla na Purok ocho, Barangay Picanan, Kumalarang.
Base na investigacion, si Linuag ta guardia con Danelle Chris Oliveros, el right of way officer del Philippine Fiber Optic Cable Network, quien ta inspecciona con el kable del companiya na Purok ocho Barangay Picanan, Kumalarang.
Asegun alegaomente ya tira con Linuag cuando ya precura ele pacifica con Dumagat despues que ya confronta el suspechao con Oliveros.
Si Dumagat ta cubra con Oliveros por el destoso cuando ya instola fiber optic cable na lugar del su amigo, conosido lang como in tal Uctol.
Asegun con Albarico cay ya lleba na hospital con Linuag pero ya declara conele muerto cuando ya llega ha hospital
Ya recubri na lugar del crimen tres maga capsula de caliber cuarenta’y sinco pistola. El suspechao ya escapa despues del incidente. (B. Garcia)