Aron mapreserba ug mapakita sa katawhan ang kanindot sa mga wildlife sa Misamis Oriental, gipangunahan sa dakbayan sa Gingoog City ang labing una nga Bird Photography contest nga bukas sa tanang mga professional photographers.
Ang maong contest magpakita sa kaanindot sa mga namuyo nga mga wild birds sa Mt. Balatukan Range Natural Park diin nagpuyo ang mga nagkalain-lain nga mga wildlife animals sama sa Apo Mayna, Coleto, Sunbird, Mountain White Eye, Mindanao Lorikeet ug lakip na ang nagkalain-laing ihalas nga mga langgam nga makita inubanan sa mga flora ug fauna nga kahinaman ug kaibgan gyud sa tanan.
Tungod niini, ang Mt. Balatukan Range Natural Park nag-imbita sa mga professional photographers nga nag edad 22 ngadto sa 55.
Kini abli sa tanang mga residente sa probinsya sa Misamis Oriental nga adunay kaugalingon nga DSLR Camera ug mga ekipo.
Aduna kini registration fee nga ₱ 2,000.00 ug naglakip sa pagrehistro ang libreng t-shirt ug guide sa mga partisipante.
Gikinahanglan usab nga haom sa pang-hiking ang outfit sa mga partisipante gumikan ang venue niini anaa man sa Mt. Balatukan Range Natural Park.
Isip ganti sa mananaog, adunay naghulat nga ₱ 30,000.00 alang sa 1st Prize, ₱ 20,000.00 isip 2nd Prize ug ₱ 15,000.00 sa 3rd prize.
Kahinumduman nga bag-o lang gilunsad sa dapit ang Mt. Balatukan Range Cluster Convergence Area Development Plan nga gipanguluhan sa amahan sa lalawigan Governor Bambi Emano ug mga nagkalainlaing mga ahensya sa Gobyerno nga adunay usa ka kumon nga katuyoan nga maprotektahan ang Mt. Balatukan tungod kay giila kini nga last frontier sa lalawigan.
Tungod sa pandemya, ang buhatan sa Protected Area Management niini nakadesisyon nga dili una ipadayon ang maong kalihokan ug ipadayun lamang sa saktong panahon nga luwas na ug maayo na ang kahimtang sa lalawigan sa Misamis Oriental. (Public Information Office-MisOr)