Gitakdang i-swab kuman na adlaw an 110 ka mga nag-schooling na mga police sa Camp George T. Barbers PNP Regional Training Center sa Brgy. Lipata, Surigao City.
Sa emergency meeting kahapon sa City Inter Agency Task Force nga gipangulohan ni City Mayor Ernesto U. Matugas Jr., nauyonan nga magpabilin anay sa suyod sa kampo an tanan mga police lakip na an training staff agig pagsunod sa guidelines sanan protocol sa granular lockdown na tagpatuman sa kampo. Naka-isolate na sa lain na building an 73 ka mga police na may mild CoViD-19 symptoms. Kon moisan an ila simtomas, dayhon sila sa hospital.
Sumala pa ni Atty. Manuelito Delani, City Legal Officer, waya mauyoni sa task force an hangyo na pagawason sa kampo aron makapauli sa ilang tagsa tagsa ka lugar an mga waya matakdi sa virus.
An Surigao City magpatuman sa modified enhanced community quarantine sugod sa Mayo 28 hangtud Hunyo 4 ning tuiga subay sa Executive Order 21-023 na tagpakanaug ni Governor Francisco T. Matugas. Lakip mapailawom sa MECQ an mga munisipyo sa Claver, Gigaquit, General Luna, Malimono, Placer sanan Sison. (RPN DXKS Surigao)
