Malamposong nahuman sa usa ka bulan nga pagbansay ang 108 ka mga aktibong sundalo ubos sa Task Force Gensan sa liderato ni Col. Galileo Goyena isip pagpangandam sa bisan unsang matang sa hulga sa terorismo kon pagpangatake sa dautang mga tawo susama sa nahitabong giyera sa Marawi.
Ang pagbansay gitawag nga “ Urban battle combat , marksmanship and checkpoint training “, . Tumong niining pakusgan ang kapasidad sa mga sundalo sa pagbantay sa tanang lugar sa syudad sa Gensan.
Matud pa ni Col. Goyena nga gitudluan ang mga sundalo nga mo ponting gamit ang rifle nga M16 armalite ug pistol kon marksmanship ug kini gipahigayon sa SAFI firing range , Brgy. Tinoto, Maasim.
Atol sa closing ceremony mitambong si Commodore Marfin Tan Philippine Navy Reserve ug Gensan City Vice Mayor Atty. Loreto Acharon ug mga kaubanan ilabina gikan sa business sector pinaagi ni Brigada Elmer Catulpos.
Gipresentar ni Col. Goyena ang pipika ka sundalo nga nakasuot full battle gear gikan sa head gear, bullet proof body armor with communication ug mao kini ang handum matud pa sa maong labaw sa Taskforce Gensan nga tanang mga sundalo ubos sa iyang liderato ang kumpleto sa maong kagamitan dinhi sa syudad sa Gensan.
Human sa maong rigid training gilayong I deploy ang maong mga sundalo sa tanang mga checkpoints ug maoy magpahigayon ug patrolya sa palibot sa syudad.
Gikalipay usab niini ang suporta sa LGU Gensan sa pagpanguna ni Mayor Ronnel Rivera ug mga opisyal sa syudad ug padayon kining misaad sa hugtanong pagbantay sa seguridad kauban ang mga elemento sa kapulisan ug mga residente.
Ang maong aktibidad ang gitambungan usab sa Tri – Media Organization for Peace and Alliance in Mindanao (TROPA SarGen). (Roniel Degorio, RPN DXDX Gensan)