PATAY ang usa ka 60 anyos nga si Ruben Nahine nga taga Mambuaya ning dakbayan human nga ang gimaneho niining Honda nga motorsiklo nalambigit sa disgrasya tali usa ka Raider nga motorsiklo ug jeep nga Dansolihon Liner.
Subay sa report nga naglatas sa CDO-Airport-Bukidnon Road sa Zone 3, Brgy. Mambuaya ning dakbayan ang mga nalambigit nga sakyanan.
Giingong pareho nga pa-norte ang Jeep ug ang Raider dihang kalit nga mihunong ang Jeep aron magpasakay og pasahero ug gilayong mi-overtake ang Raider.
Apan wala damha nga ang kasugat nga motorsiklong Honda milihay usab sa iro nga milabang rason nga siya napaingon sa lane sa Raider ug nagresulta sa ilang panagbangga.
Tungod sa kusog nga impact, ang duha ka motorsiklo parehong nalabay paingon sa Jeep nga nagresulta sa pagka-angol sa mga driver ug backrider sa Raider ug Honda.
Hisayran nga gidala pa sa NMMC ang biktima apan gideklara nga dead on arrival.