Gihulat na lamang karon sa General Santos City Police Office ang commitment order sa korte aron hingpit nang mabalhog sa Lanton Reformatory Center ang naarestong drug suspect, atol sa gikasang buy-bust operation sa miaging adlaw.
Una nang giila sa kapulisan ang dinakpan nga si Tony Duluan Mamintal ug residente sa Sitio Posaka, Barangay Kapinpilan, Midsayap, North Cotabato.
Narekber kang Mamintal ang anaa sa 12 ka sachet sa suspected shabu atol sa gipahigayong anti-illegal drugs operation sa bahin sa Habitat Phase B, Barangay San Isidro.
Gikataho usab nga anaa sa P680,000 ang balor sa ginadiling droga ang nasakmit sa posisyon sa suspek.
Samtang, gibutyag usab ni GSCPO spokesperson Lt. Clarizel Perez, nga adunay standing warrant of arrest ang dinakpan sa kasong may kalabutan gihapon sa pagpayuhot sa ginadiling droga.