Gumikan kay giila nga “Food Basket” sa Misamis Oriental ang lungsod sa Claveria, usa ka Bagsakan Center ang gikatakda nga tukuron sa Administrasyon ni Gobernador Bambi Emano sa Barangay Mat-I sa nasangpit nga lungsod.
Usa sa agenda sa 2nd Provincial Development Council Meeting mao ang pag-endorso nga malakip sa Provincial Commodity Investment Plan (PCIP) ang katukoran sa Bagkasan Center.
Ang lungsod sa Claveria nga pinakadako nga munisipyo maoy nanguna nga industriya sa agri-ecotourism samtang ang Barangay Mat-I nga sakop niini ang ikaduha sa labing dako nga barangay sa lungsod ug ikaduha nga adunay daghan populasyon labina nga ang ilang kinatibuk-ang kadak-on sa yuta moabot ngadto sa 14,400.75 ektarya.
Ang Barangay Mat-I mao ang nag-una nga barangay nga nagprodyus og saging, sayote, abaca fiber, ug upland rice.
Nagkalainlain nga utanon, root crops ug cutflowers usab ang gipananom sa lugar.
Ang katuyoan sa proyekto nga gipundohan og ₱ 64 milyon mao ang pagtukod ug paghimo og usa ka moderno nga Food Terminal sa Mat-I nga maoy magkonektar sa mga mag-uuma sa merkado aron madugangan ang ilang kita, makahatag og trabaho, ug mapalambo ang ilang mga tagsa-tagsa ka pamuyo.
Ang pagatukoron nga Bagsakan Center magsilbing distribution channel ug merkado alang sa mga output o abot sa Agrikultura sa dapit ug adunay mahimutangan sa mga produkto labina kung mahuman na ang ani usa dayon ipaabot ngadto sa mga kamerkadohan sa lalawigan.
Ang maong proyekto lakip haligi sa programa ug serbisyo ni Gobernador Bambi aron mas mapalambo pa ang natad sa Agrikultura, Infrastraktura, kooperatiba ug Peace and Order.
Gumikan sa misyon ug bisyon ni Governor Bambi nga palamboun ang lalawigan ug dili moundang sa pagpaningkamot aron masiguro nga tanan programa ug plano mapaabot sa katawhan usa lamang kini ka ehemplo nga nagpamatuod sa iyang talagsaon ug ka-epektibo nga lider.
(Provincial Information Office – MisOr)