Laumang sa bulan sa Agosto ning tuig hingpit na nga matibawas ug iturn-over ang kasamtangan pa nga gitukod nga DOST-PAGASA Planetarium Observatory nga nahimutang diha sa Brgy. Molugan, El Salvador City ning lalawigan.
Sa tinguha nga mapalambo pa og samot ang natad sa turismo dinhi sa lalawigan sa Misamis Oriental, sa dili madugay mahatagan na og katumanan ang plano mahitungod sa kasamtangang ginatukod nga DOST-PAGASA Planetarium Observatory.
Ang buhatan sa Provincial Legal Office nga usa sa sa nangulong buhatan aron mapadayon ug moasistar sa dagan sa katukoran sa proyekto nagbutyag nga ang ₱ 50 million kantidad nga pasilidad anaa na sa 60% ang pagkatibawas.
Kahinumdoman niadtong Marso 2019 gisugdan kini nga plano ug gipahigayon gilayon ang ground breaking ug capsule laying kon diin kini nga pasilidad gilantaw nga usa ka world class facility ug mamahimong pinaka-unang Planetarium sa tibuok Mindanao.
Hilabihan ang nabating excitement ni Gobernador Bambi Emano tungod kay niini nga Planetarium posible na nga masaksihan sa tanan ang maanindot nga talan-awon sa mga ‘heavenly’ kon ‘celestial bodies’.
Niini sab nga proyekto nasutang dili basta-basta ang gamitong modern projector ug digital telescope sa sulod sa gitakdang showroom niini.
Usa sa nagsilbing tumong sa katukoran sa Planetarium mao ang dakong kahimuan alang sa mga kabataan nga nagtungha aron mas molawom ang pagsabot kalabot sa siyensiya lakip na ang mahatag nga kalipay kon enjoyment samtang gatoun kalabot sa mga planeta, constellations ug uban pang astronomical objects.
Laumang makadugang kini sa pagdaghan sa mga lokal ug langyaw nga turista nga mobisita sa lalawigan labina kon moabot na sa normal ang tanan.
Suportado ug kaabag kanunay sa kagamhanan sa probinsya sa Misamis Oriental ang mga proyekto sa nagkalain-laing ahensya kay nasayod si Gobernador Bambi nga dako kini og ikatabang sa panginabuhian sa katawhan ingon man dako sab og tabang sa paspas nga kalamboan sa turismo sa lalawigan.
(Rejiann Ammor R. Maygay, PIO)
(Source: Misamis Oriental Provincial Information Office Facebook page)