Mokabat na sa ₱ 4.8 milyones ang na-release sa administrasyon ni Mayor Oscar Moreno isip indemnification cash assistance ngadto sa 783 ka mga farmers human gi-culling ang ilang mga binuhing baboy tungod sa African Swine Fever (ASF) ug nakasulod sa ground zero diin anaa ang nagpositibo ug nasulod sa 500-meter radius.
Ang mga farmers gikan sa 22 ka mga barangay sa Cagayan de Oro nga naigo sa ASF basi sa ulahing listahan sa Anti-African Swine Fever Task Force sa syudad.
Kini nga mga barangay mao ang: 1. Mambuaya, 2. Baikingon, 3. San Simon, 4. Agusan, 5. Macasandig, 6. Indahag, 7. Puerto, 8. Tablon, 9. Patag, 10. Carmen, 11. Cugman, 12. Canitoan, 13. Pagatpat (within 500-meter radius of Canitoan), 14. Bulua, 15. Puntod, 16. Macabalan (within 500-meter radius of Puntod), 17. Tumpagon, 18. FS Catanico, 19. Gusa, 20. Lapasan (within 500-meter radius of Gusa), 21. Kauswagan ug 22. Iponan.
Ang syudad mihatag kada farmers og ₱ P2,000 matag baboy nga na-culling. Gawas sa maong kantidad, makadawat usab sila og P5,000 indemnification cash assistance gikan sa Department of Agriculture (DA) matag baboy nga na-culling.
Samtang nagpadayon ang syudad pinaagi sa Anti-ASF Task Force pagpatuman sa mga protocols ug uban pa nga mga pamaagi aron masumpo ang pagkuyanap sa ASF.
Gani, bag-ohay lang nahugpong ang mga lechonero ning syudad isip usa sa mga kampanya batok ASF ug sa samang higayon intervention program aron matabangan ang meat vendors sa kamerkaduhan, hog raisers ug lechoneros alang sa gitawag nga ‘market matching’.
Kini sa tuyo nga matabangan ang mga hog raisers gikan sa ‘green areas’ o dili pa apektado sa ASF o’ wala nasulod sa 500-meter radius nga direktang makabaligya sa ilang mga baboy ngadto sa mga meat vendors ug lechoneros sa insakto nga presyo.
Apan gipasabot ni City Veterinarian Dr. Lucien Anthony Acac nga kinahanglan gihapon ang veterinary certificate diha sa ilang pagbaligya ug pag-ihaw didto sa slaughterhouse. (City Information Office)
