Cebu City – “Mission Accomplished” na ang pagpasar sa duha ka mga dagkong proyekto sa Dakbayan sa Lapu-Lapu.
Aprubado na sa konseho sa syudad sa Lapu-Lapu sa ilang session kagahapon, Hulyo 29, 2021, ang Socialized Housing Ordinance sa syudad.
Kini ang gibutyag ni Lapu-Lapu City Councilor Rico Amores pinaagi sa post sa iyang Facebook account.
“Aprubado na sa konseho ang Socialized Housing Ordinance. Ratification ra ni sa existing resolution,” mensahi ni Amores.
Mobalor ang Socialized Housing ug ₱ 3.7B ubos sa Private Public Partnership nga tukoron diha sa Barangay Canjulao.
Aprubado na sab ang ₱ 3.1M nga request alang sa Air-Conditioning Units ug mga equipment sa Lapu-Lapu City Hospital.
Matod ni Konsehal Rico Amores nga dili tinuod nga gibasura kini o gibabagan para dili mapasar ang maong mga proyekto.
Sa imaging semana, nahitabo ang tinubagay sa social media tali ni Lapu-Lapu City Mayor Junard Chan ug Konsehal Amores mahitungod sa duha ka dagkong mga proyekto.
Namahayag si Chan nga gibabagan o gilangay sa konseho ang pagpasar sa o pag ratify sa socialized housing project sa Barangay Canjulao ug ang ₱ 3.1M nga budget alang sa air-conditioning units ug ubang equipment sa Lapu-Lapu City District Hospital.
Suma pa ni Chan nga ang duha ka mga proyekto duha na ka higayon nga na defer sa konseho.
Una niini, gikabalak-an sa mayor nga di mapasar ang maong mga proyekto human sa nahitabong re-organization sa committee chairmanship sa konseho.
Sa maong re-organization, gipang hukasan ang mga konsehal nga ka alyado ni Chan sa ilang tagsa tagsa ka komitiba.
Si Amores maoy gituuhan sa mayor nga maoy nangulo sa maong reorganisasyon sa konseho.
Niadtong higayona si Chan miluwat ug upat ka isyu batok kang Amores, kinsa mitagsa tagsa sab ug tubag pasabot sa iyang habig matag isyu. (Jhon Tadlip)
(News & photos courtesy of Lapu-Lapu City Council via Councilor Rico Amores | Mayor Junard Chan)