Pasiunang girekomendar sa komite nga nagdungog sa 2021 executive budget hearing nga gidumala ni konsehal Edna Dahino ang kapin ₱ 16.20 milyones nga pundo alang sa pagpatuman sa mga programa ug proyekto nga magdala og kaayuhan ug kaarangan sa kinabuhi sa kababaehan ug mga pamilya.
Sa nagpadayong 2021 budget hearing, si Dahino kinsa mao usab ang chairman sa komite sa women and family relations, malipayon nga nagpahibalo nga taliwala sa pagkunhod sa gisugyot nga annual budget, nahatagan sa omento ang pundo alang sa pamilya.
Ang mga programa ug proyektong padayong mapatuman sunod tuig naglakip sa practical skills development alang sa mga inahan, pamilya ingon man rehabilitated ug recovered clients balor ₱ 1.6 milyones; Women Development Center nga adunay gisugyot nga pundo balor ₱ 5.81 milyones; livelihood program balor ₱ 1.6 milyones; pagpahigayon sa family week/parents congress balor ₱ 1 ka milyon; suporta sa inter-agency program balor ₱ 1.84 milyones; migrant workers welfare program balor ₱ 700 mil, suporta sa mga sectoral communities sama sa ERPAT, KALIPI ug Solo Parents balor ₱ 600 mil; seminars, training, services ug resource mobilization balor ₱ 1.41 milyones ug community participation and family drug abuse prevention program balor ₱ 1.59 milyones.
Dako ang paglaum ni Dahino nga taliwala sa nasinating pandemya, magpabiling lig-on ang matag pamilya aron masagubang ang bisan unsang kalisdanan inubanan sa pag-abag sa kagamhanan sa dakbayan.
Ang maong mga programa ipatuman ubos sa City Social Welfare and Services Department.(Sangguniang Panlungsod – CdeO)