35 C
Manila
Friday, April 19, 2024

₱7.25 Bilyones Nga Oro Annual Budget Alang Sa 2021 Tukion Sa Konseho

- Advertisement -

Cagayan de Oro City – Gipaabot tukion sa konseho ning syudad ubos ni bise mayor Kikang Uy ang gisumite ni mayor Oscar Moreno nga annual budget sa Cagayan de Oro alang sa tuig 2021 balor ₱ 7.25 bilyones.

Kini human gisagop sa sesyon ang resolusyon nga nagmugna sa tibouk konseho isip committee of the whole aron mopahigayon sa pagtuki sa 2021 Annual Budget nga pangunahan sa chairman sa komitiba sa panalapi.

Ang mayor mipasabot nga ang gisumiteng budget adunay pagkunhod og ₱ 250 milyones kun 3.3 porsyento gikan sa gibana-banang budget karong tuiga nga ₱ 7.5 bilyones gumikan sa gilantaw’ng economic setbacks dala niining nasinating pandemya nga posibleng makaapekto sa kinitaan sa local revenues.

Gidugang sa mayor nga gumikan sa Covid-19, nausab ang mga prayoridad sa dakbayan sa pagpatuman sa mga programa ug proyekto ug gitutok kini sa pagtubag sa epekto sa pandemya ug mapadali ang pagbusikad sa ekonomiya.

Ang ₱ 7.25 bilyones nga sugyot gitinguha aron makalahutay ug mapalig-on pa ang mga lakang sa dakbayan kontra Covid-19 samtang padayon nga ipatuman ang mga proyekto sa imprastraktura ug uban pang nag-unang programa sa dakbayan.

Gipasalig ni Moreno nga walay ipahamtang nga mga bag-ong balayronon sa buhis sa umaabot nga tuig kun dili hingusgan sa dakbayan ang pagkolekta pinaagi sa online payment system, ease of doing business, paghatag og diskwento ug ang pagkolekta sa mga delingkwenteng realty taxes.

Sa unang higayon, ang mayor misugyot sa paghulam isip usa sa mga tinubdan sa pundo alang sa tuig 2021. Kini aduna nay sertipikasyon gikan sa Bureau of Local Government Finance (BLGF).

Niini, ang ₱ 7.25 bilyones nga sugyot maglangkob sa ₱ 1.94 bilyones kapin kon 26.76% nga gahin alang sa general public services; ₱ 2.31 bilyones kon 31.83% alang sa social services nga naglakip sa health, nutrition & hospital services ug social security, services and welfare; ug ₱ 3 bilyones kapin kon 41.40% alang sa economic services.

Ang gisugyot nga hulamang ₱ 1 ka bilyon gamiton agi’g pundo sa redevelopment sa Bolonsiri Memorial Park balor ₱ 400 milyones; pagtibawas sa 5-storey City Library & School Building with basement parking balor ₱ 400 milyones; ug ang pagkompleto sa City Hospitals dinha sa Lumbia ug Tablon balor ₱ 200 milyones.

Dako ang paglaum sa mayor nga pinaagi sa suporta sa matag usa mabuntog kining nasinating krisis ug dungan nga makabangon ang dakbayan kuyog sa katawhan. (Sangguniang Panlungsod-CdeO)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -