Tulo Ka Miembro Sa Pamilya Patay Sa Nahitabong Sunog Sa Buhangin

0
64

Davao City:         Luwas na sa delikadong kahimtang sulod sa Southern Philippines Medical Center si Pamela Pascual 16 anyos ang pangidaron ang maguwang nga anak sa pamilya Pascual kinsa naluwas sa nahitabong sunog sa ilang kaugalingong balay pasado alas Tres (3) sa kadlawon kagahapon.

Nasayran nga nakit-an mismo ni Pamela ang iyang inahan nga si Rose Pascual  44 anyos ug manghod nga si Carmela Pascual 12 anyos kinsa naggakos samtang nagdelaab ang kalayo sa ilanghang lawas resulta sa ilang kamatayon samtang buntag na usab nga nakit an ang patayng lawas sa Padre de Pamilya nga si Christopher Pascual 44 anyos ang pangidaron.

Sumala pa sa mga residente nga naglisod sila sa pagtabang nga mapalong ang kalayo sanglit taas ang pader nga nakapalibot sa balay samtang naka kandado usab ang gate niini. Nasayran nga bugtong si Pamela lamang ang nasalbar sa mga silingan sanglit baga na ang aso ug kalayo sa nasunog nga balay hinungdan nga wala na masalbar pa ang ubang miembro sa Pamilya.

Pinasubay sa impormasyon gikan sa Bureau of Fire Protection Davao City nga nahitabo ang sunog alas Tres e Medya (3:30) sa kadlawon sa may Block 22 Lot 3 Oxford Street NHA Buhangin ning syudad. Sumala pa sa Bureau of Fire Protection nga duha ka anggulo ang ilang giimbistigahang hinungdan sa sunog nga naglangkob sa napasagdang naka charge nga Gadget ingon man ang Liquified Petroleum Gas kun LPG.

Gideklarang fireout ang ensidente pasado alas 5 sa  buntag kagahapon samtang ang Scene of the Crime Operative nagdala sa mga patayng lawas nga nangusunog ngadtu sa Anghel Funeral Homes alang sa Post Mortem Examination.

LEAVE A REPLY

Please enter your comment!
Please enter your name here